Id

chalo hum id manaen ki jashn ka din hai
KHushi ke git sunaen ki jashn ka din hai

ruKHon pe phul khilaen ki jashn ka din hai
dilon mein prit jagaen ki jashn ka din hai

magar ruko zara Thahro ye siskiyan kaisi
KHushi ki rut mein dukhon ki ye badliyan kaisi

suno ye ghaur se maen bilak rahi hain kahin
ye dekho bachchon ki aankhen chhalak rahi hain kahin

kisi ke id ke joDe mein hai kafan aaya
kahin pe zaKHmon se lipTa hua badan aaya

koi to khilne se pahle kali ko luT gaya
kahin daraKHt hi apni zamin se TuT gaya

kis ne kar diye pamal saya-dar shajar
jaDen kahin pe kaTin aur kahin bache na samar

kahan hain wo ki jo KHud ko KHuda samajhte hain
wo jo ki amn-o-aman ke fasane kahte hain

wo jin ke hath mein rahta hai parcham-e-insa'n
hue hain un ke sab afkar-e-amn ab uryan

agar hain sahab-e-kirdar to zaban kholen
agar hain sahab-e-iman to phir wo sach bolen

hain muqtadir to bas ab rok len husam-e-jaur
ye bahti KHun ki nadiyan musibaton ka daur

pa un se koi umid-e-wafa kare kaise
jo ba-dua ho mujassam dua kare kaise

jahan mein chaar taraf chiKH hai karahe hain
sitam-rasida dilon se nikalti aahen hain

hai shor-e-nala-o-ah-o-buka chahaar taraf
kahan ki id hai matam bapa chahaar taraf

manae kaise koi id har taraf gham hai
manae kaise koi id aankh pur-nam hai

sunae kaise koi git saz TuT gae
jagae kaise koi aas apne chhuT gae

magar ye id ka din bhi to ek haqiqat hai
ki wajh-e-id samajhna bhi ek ibaadat hai

chalo ki rote huon ko hansa ke id manaen
kisi ke dard ko apna bana ke id manaen

dilon se apne adawat miTa ke id manaen
kisi ke lab pe tabassum saja ke id manaen