Id milan

bichhDe huon ko bichhDe huon se milae hai
har samt id jashn-e-mohabbat manae hai

insaniyat ki peng mohabbat baDhae hai
mausam har ek umid ko jhula jhulae hai

barish mein khet aisi tarah se nahae hai
raunaq har ek kisan ke chehre pe aae hai

hum sab ko apne ghere mein lene ke waste
chaaron taraf se ghir ke ghaTa aaj aae hai

haiwaniyat ne KHun ke dhabbe janam diye
barsat aa ke KHun ke dhabbe chhuDae hai

shahzadi-e-bahaar ki aamad hai bagh mein
har ek phul rah mein aankhen bichhae hai

hai kitni pyari pyar bhari id ki ada
apna samajh ke sab ko gale se lagae hai

sach puchhiye to ye bhi mohabbat ka hai subut
jo rae aap ki hai wahi meri rae hai

bauchhaaren aa ke deti hain us ko salamiyan
bansi baja baja ke jo mela lagae hai

main jaunga to phir kabhi wapas na aaunga
kali ghaTa to har baras aae hai jae hai

id-ul-fitar ki wajh-e-sharafat to dekhiye
har sal aa ke sab ko gale se lagae hai

dije duaen id ki tyauhaar ko 'nazir'
ek bhiD aaj aap se milne ko aae hai