Husn-e-qubul

garaj raha hai siyah mast pil paikar-e-abr
udas koh ki choTi pe ek tanha peD

uTha raha hai su-e-asman wo tanha shaKH
sarak rahi hai abhi jis mein zindagi ki nami

baDha ho jaise kisi be-nawa ka bekas hath
hujum-e-yas mein ek aaKHiri dua ke liye

baras muhit-e-karam ek bar aur baras
bas ek bar mujhe aur phul lane de

taDap raha hai abhi mujh mein saz-o-barg-e-numu
ye meri kaliyan ye patte abhi to zindagi hun

utar utar mere daman pe phul barsa de
machal ke abr ke pardon se be-hijab aaya

dua-e-nim-shabi ka magar jawab aaya
sharar-e-barq ka haijaan

peD taur ba-dast
za-farq ta ba-qadam ek phul

husn-e-qubul