Hindu muslim ittihad

hind hindostan walo tum ai hindu musalmano
tumhi aapas ke kul jhagDon ko be-khaTke miTa sakte

hain donon bulbul-e-shaida hai donon ka gulistan ye
na tum bhi chhoD sakte ho na wo bhi yan se ja sakte

to phir kya faeda hai tum ko har-dam yun jhagaDne mein
agar mil-jul ke aapas mein ho kul bigDi bana sakte

tumhaare kaam wo aaen tum un ka sath do har-dam
kudurat dil ki us surat se donon ho miTa sakte

ujaDte dekh kar is taur se KHamosh rahna kya
jo is ujDi hui basti ko ulfat se basa sakte

jo tum chaho to is ki dhum ek aalam mein mach jae
yahi hain wo ki jo ruThe huon ko hain mana sakte

wahi hain laeq-e-tahsin 'kubra' baghbanon mein
ki jo kumhlai kaliyon ko chaman ki hain khila sakte