Hijr o visal

KHud apne dil ka KHun faza mein uchhaal ke
mazmun likhe hain hum ne firaq o visal ke

kuchh sanehon ki yaad hai unwan-e-roz-o-shab
kuchh hadse hain nok-e-zaban mah o sal ke

ek na-tamam dard sharik-e-chaman raha
shaKHon pe konpalon ki naqaben ujal ke

sehn-e-haram se anjuman-e-mai-farosh tak
do-gam fasla hai zara dekh-bhaal ke

pachhta rahe hain naghma-sarayan-e-fasl-e-gul
bazm-e-chaman se sarw-o-saman ko nikal ke

hum ne kiya hai gardish-e-dauran ko paemal
hum ne sahe hain zaKHm zamane ki chaal ke

'shorish' zamana hum se muafiq na ho saka
hum log hain chaman mein purane KHayal ke