Hasrat-e-parwaz

aaghosh-e-ehtiyat mein rakh lun jigar kahin
Darta hun le uDe na kisi ki nazar kahin

ghurbat mein ajnabi ka bhi hota hai ghar kahin
din-bhar kahin guzar diya raat-bhar kahin

aghyar hun kahin but-e-shorida-sar kahin
sab kuchh ho aah mein to ho apni asar kahin

yun uf na bagh-e-dahr mein barbaad ho koi
bulbul ka aashiyan hai kahin baal-o-par kahin

main aaj apni aah ka karta hun imtihan
hun aasman zamin na zer-o-zabar kahin

qaid-e-qafas mein hasrat-e-parwaz kyun rahe
sayyaad jo uDa de na hai baal-o-par kahin

rahti hai un ki yaad meri dil mein har ghaDi
'auj' un ke dil mein kash ho mera bhi ghar kahin