badan ke jharoke mein jitni nigahen lagi hain
meri hain
koi aur kab sochta hai
ki gham-KHana-e-'mir' ke us taraf
ek hansta mahakta baghicha bhi hai
kitni an-chhui kaliyan
jawan titliyan
ras-bhari jhumti Daliyan
sondhi miTTi ki ham-jins KHushbu
labaalab si ek baoli
jaane kya kuchh
magar wo jharoka
ki jis ka mere dil se ek wasta hai
abhi band hai
kaam nazuk hai aafaq ki kar-gah ka
Nazm
Gulshan-e-na-afrida
Shahnaz Nabi