wo ek laDki
ki jis se shayad main ek pal bhi nahin mili hun
main us ke chehre ko jaanti hun
ki us ka chehra
tumhaari nazmon tumhaari giton ki chilmanon se ubhar raha hai
yaqin jaano
mujhe ye chehra tumhaare apne wajud se bhi aziz-tar hai
ki us ki aaankhon mein
chahaton ke wahi samundar chhupe hain
jo meri apni aaankhon mein maujzan hain
wo tum ko ek dewta bana kar meri tarah pujti rahi hai
us ek laDki ka jism
KHud mera hi badan hai
wo ek laDki
jo mere apne gae janam ki madhur sada hai
Nazm
Gae janam ki sada
Parveen Shakir