Europe ki pahli jhalak

baad-o-baran se ulajhta KHanda-zan girdab par
ek jazira tairta jata hai sath-e-ab par

gum kai sadiyon ka us mein jazba-e-tahqiq hai
ye jazira aadmi ke zehn ki taKHliq hai

ja raha hai har ghaDi maujon se Takraata hua
apne hi andaz mein apna rajaz gata hua

bahr ki amwaj par bahte hue shahr-e-jamil
har qadam tera liye hai teri azmat ki dalil

aandhiyon ka zor, maujon ki rawani tujh mein hai
irtiqa-e-zehn-e-insan ki kahani tujh mein hai

har bhanwar mein aur har tufan mein sahil hai tu
sina-e-imroz-o-farda ka dhaDakta dil hai tu

to tajalli hi tajalli hai andheri raat mein
raushni ka hai manara aalam-e-zulmat mein

raat aai jag uTha insan ka zauq-e-be-bisat
aaKHiri is ka Thikana mard o zan ka iKHtilat

kis qadar arzan hue tahzib ke lamat-e-nur
allah allah chaar jaanib raushni ka ye wafur

is tarah se main ne kab dekhi thi mai-KHane mein dhum
auraton mardon ka laDkon laDkiyon ka ye hujum

sab nashe mein mast hain lekin hain kitne ba-KHabar
phir rahe hain sab ke sab ek dusre ko tham kar

ahmarin saghar, lab-e-lalin, nigahen mai-farosh
har taraf hai ek masti, har taraf hai ek KHarosh

is jagah idrak se begana koi bhi nahin
sab hain farzane yahan diwana koi bhi nahin

aql ki is bazm mein diwangi ka kaam kya
DhunDhta hai tu yahan aa kar dil-e-nakaam kya

itni aagahi kisi ko ho ye mohlat hi nahin
kis ki bahen kis ki gardan mein hamail ho gain

aa ke aaghosh-e-hawas mein KHud yahan girta hai husn
kis qadar kachche sahaare DhunDhta phirta hai husn

jis se KHira teri aankhen hain chamak europe ki hai
dekh ai 'azad'! ye pahli jhalak europe ki hai