Ek laDki shadan

ek laDki thi chhoTi si
dubli si aur moTi si

nannhi si aur munni si
bilkul hi than mathni si

us ke baal the kale se
sidhe ghunghrale se

munh par us ke lali si
chaTTi si maTyali si

us ki nak pakoDi si
nokili si chauDi si

aankhen kali nili si
surKH safed aur pili si

kapDe us ke thaile se
ujle se aur maile se

ye laDki thi bholi si
bi bi si aur goli si

har dam khel tha kaam us ka
shadan bi-bi nam tha us ka

hansti thi aur roti thi
jagti thi aur soti thi

har dam us ki amman-jaan
khincha karti us ke kan

kahti thin maktab ko ja
khelon mein mat waqt ganwa

ammi sab kuchh kahti thi
shadan khelti rahti thi

ek din shadan khel mein thi
aae us ke abba ji

wo lahore se aae the
chizen wizen lae the

box mein thin ye chizen sab
KHair tamasha dekho ab

abba ne aate hi kaha
shadan aa kuchh paDh ke suna

gum thi ek muddat se kitab
kya deti is waqt jawab

do bahnen thin shadan ki
chhoTi nannhi munni si

nam tha manjhli ka siman
guDiya si nannhi nadan

wo boli ai abba ji
ab to paDhti hun main bhi

billi hai c a T cat
chuha hai r a T rat

munh mouth hai nak hai nose
aur gulab ka phul hai rose

main ne abba ji dekha
KHub sabaq hai yaad kiya

shadan ne us waqt kaha
main ne hi to sikhaya tha

lekin abba ne chup chap
khola box ko uTh kar aap

is mein jo chizen niklen
sari siman ko de den

ek chini ki guDiya thi
ek jadu ki puDiya thi

ek nannhi si thi motor
aap hi chalti thi far-far

gendon ka ek joDa tha
ek lakDi ka ghoDa tha

ek siTi thi ek baja
ek tha miTTi ka raja

shadan ko kuchh bhi na mila
yani khel ki pai saza

ab wo ghaur se paDhti hai
pure taur se paDhti hai