main kore kaghaz par likhun phir ek kali nazm
alakh jagate sannaTon se phir se sajaun bazm
gaddar amrudon ki KHushbu pagal kar jae
meri in KHali aaankhon ko jal-thal kar jae
dur darindon ki aawazen KHud se laDti hon
mere us ke bich mein lambi raaten paDti hon
shiknon se aari ek bistar mujh ko takta ho
jism mera jab aadha sota aadha jagta ho
tab main karun ye azm
ki likhun koi kali nazm
Nazm
Ek kali nazm
Shahryar