hawaon ki barfab si ungliyan
kah rahi hain
kahin pas hi
musla-dhaar barish hui hai
pahaDon ki daman mein shayad
gai raat ko barf girti rahi hai
lahu mein utarta hua
dusra ek lamha
kahin kuchh nahin
kuchh bhi badla nahin hai
na mausam na garmi hawa ki
faqat mere ehsas ki yaKH-bastagi
chupke chupke
mere KHun ko munjamid kar rahi hai
mere jism mein
kapkapi bhar rahi hai
Nazm
Lahu mein utarta hua mausam
Mushtaq Ali Shahid