main bhul jaun tumhein
ab yahi munasib hai
magar bhulana bhi chahun to kis tarah bhulun
ki tum to phir bhi haqiqat wo
koi KHwab nahin
yahan to dil ka ye aalam hai kya kahun
kam-baKHt!
bhula na paya wo silsila
jo tha hi nahin
wo ek KHayal
jo aawaz tak gaya hi nahin
wo ek baat
jo main kah nahin saka tum se
wo ek rabt
jo hum mein kabhi raha hi nahin
mujhe hai yaad wo sab
jo kabhi hua hi nahin
Nazm
Dushwari
Javed Akhtar