Dua

ye jabr-e-mah-o-sal mein ghiri hui zamin meri gawah hai
nashat ki abad-kanar manzilon mein ek umr se main un karim aur jamil saaton ka muntazir hun

jin ki baz-gasht se mere wajud ki sadaqaton ka inkishaf ho
KHuda kare bashaaraten sunane wale KHush-kalam taeron ki Toliyan

ufuq se shaKH-e-gul talak alamat-e-visal ki lakiren khinch den
lahu ki wusaton ka inkishaf ho

lahu ki azmaton ka inkishaf ho
badan ke raste wajud ki sadaqaton ka inkishaf ho