Dimak

karam-KHurda kaghazon ke Dher mein madfun hai
chaTta hai harf harf

daere qausain san tariKH aadad o shumar
nuqta o zer-o-zabar tashdid o mad

hasil-e-binai o zauq-e-nazar
bandhta hai wahm o taKHmin o guman ke kuchh hisar

chumta hai katba-e-lauh-e-mazar
chand nuqte uD gae hain lafz kuchh kawak hain

us ki nazron mein KHazina ilm ka KHar o KHas-o-KHashak hain
kya alaem kya rumuz ishkal alfaz o huruf

aatish-e-taghair ke hathon pighal jate hain sab
waqt ki bhaTTi mein tap kar ek nae sanche mein Dhal jate hain sab

lamha lamha munkashif hota hua sar-e-hayat
munjamid alfaz ke sine mein apna nur phailata nahin

karam-KHurda kaghazon ki lash mein
KHun apna dauData nahin

karam-kaghaz hai harif-e-roz-o-shab
chaTta hai fuzla-e-ilm-o-adab

aur sar akDae KHallaqan-e-mani ki taraf KHanda-ba-lab