Dhund

raushan raushan raushan
aankhen yun markuz hui hain jaise main hi main hun

mujh mein la-tadad fasane aur maani hain
main sad-ha asrar chhupae phirta hun

main KHush-qismat hun mere sath jahan-e-rang-o-ranai hai
aur daricha-band nihan-KHanon se ruh-e-yazdan ki KHushbu uThti hai

mera sar o masham moattar karti hai
aur meri taqdir jahan par KHalq hui hai

jo arman kisi ke dil mein hai main us ki KHushbu hun
wa-hasrat ka arz o sama mein phaila naghma

jab mahbub talak ja pahunche
to phir main aawaz nahin rahta hun

aur na shiryanon ka bahta KHun-KHaraba
balki lafz-e-mutlaq ban jata hun

aankhen yun markuz hui hain jaise main hi main hun aur nahin hai koi
sachchi baat magar hai itni

main murdar samundar hun
ehsas ziyan ka jhonka hai

aankhen bol nahin sakti hain
aur badan binai se mahrum hua hai

lekin main to ab tak KHwab-zada taswiren dekh raha hun
aur samundar ke parbat par Thahra jangal

bite giton se pur jangal
azali KHamoshi ke haale mein thar-thar kanp raha hai

sadiyan saye shoKH fasilen aamanna saddaqna
ai-lo! suraj chand sitare dharti ke sine par utre

meri rahguzar par bikhre
halki maddham aur musalsal harkat

manzil phul kanwal ka phul adam ke bahr-e-be-payan mein
tanha jhule

bahar par markuz nigahon se maKHfi lafz-e-mutlaq
tanha aur udas kanwal par jhilmil jhilmil phuT baha

mauhum rida-e-koh-o-dasht-o-daman
duniya-e-man-o-tu par chhai

phiki phiki ho kar phail gai dhul bani
apna ganw, gori ke panw tak dhundlae

phaili raushan aur nirali dhund, aur dhund aur dhund