Mulaqat

ek chaurahe pe sab log chale aate hain
ek chaurahe pe milte hain guzar jate hain

an-ginat zawiye afkar ke le aate hain
in khilaunon se wo azhan ko bahlate hain

apne kartab pe wo iThlate hain itraate hain
aur mauhum si taskin yunhi pate hain

ek chaurahe pe sab log chale aate hain
ek chaurahe pe milte hain guzar jate hain

un mein KHush-kar bhi hain un mein riya-kar bhi hain
un mein gham-KHwar bhi hain un mein jafa-kar bhi hain

KHar-ha-e-mehn-o-dard ke tujjar bhi hain
aur gul-ha-e-mohabbat ke KHaridar bhi hain

shoabda-gar bhi hain chaalak bhi ayyar bhi hain
aur gardida-e-mehnat bhi hain fankar bhi hain

un mein behosh bhi hain un mein junun-kar bhi hain
un mein dana bhi hain bina bhi hain hoshiyar bhi hain

ek chaurahe pe sab log chale aate hain
ek chaurahe pe milte hain guzar jate hain

har musafir ko mulaqat ye ras aai hai
is mulaqat se hasti ne jila pai hai

is mulaqat ne ek raushni phailai hai
log baDhte hain to tahzib baDha karti hai

log laDte hain to tahzib miTa karti hai
ek chaurahe pe sab log chale aate hain

ek chaurahe pe milte hain guzar jate hain