Dastak

KHwabon ki tarsil ka kaam
ek muddat se bila-nagha jari hai

main un logon ke liye KHwab dekhta hun
jo KHud KHwab nahin dekh sakte

main KHwab dekhta hun
aur inhen kaghaz par likhta hun

kabhi aadha
kabhi pura

aur kabhi pure se bhi ziyaada
kabhi kabhi to KHwab itne ziyaada ho jate hain

ki kaghaz se bah kar
zamin par

ya mere kapDon par
ya bed-sheet par

kabhi kabhi to nashte ki mez par bhi gir jate hain
jinhen sameTna ek mushkil kaam hai

log kaghaz se mere KHwab chaTte hain
aur honTon par zaban pherte hue kahte hain

aaj bhi namak zara kam rah gaya hai
yahi ek jumla meri ujrat hai

ye main un logon ki baat kar raha hun
jo KHud KHwab nahin dekh sakte

jo dekh sakte hain
un ka rawayya qadre behtar hai

yaad rahe
main ye kaam

ujrat ke baghair bhi kar leta hun
lekin us waqt mujhe bahut diqqat hoti hai

jab raat aankhon mein kaT jati hai
aur KHwab

dur dur tak dikhai nahin dete
us waqt hath malte hue

nind aur KHwab ka intizar
bahut taklif-dah hota hai

lekin
kabhi kabhi

jab main so kar uThta hun
to KHwab mere darwaze par dastak dete hain