Dardmandi

dekhte dekhte
chyunTiyan kitni rondi gain

aaKHiri sans tak
palaT kar jhapaTne ki ummid mein

sar uThati rahin
dekhte dekhte

mere aasab mein
bijliyan ghul gain

rengti chyunTiyan
jild ko chir kar

KHun mein mil gain
ab main koi aur hun

ek ghayal darinda ki jis ke liye
zaKHm hi zaKHm hain

(chahe apne hon ya dusron ke)
aaKHiri sans tak

zaKHm hi zaKHm hain
sari basti hai sahmi hui

log sab falsafe
bandh kar bhag uThe

mujh pe ab koi hansta nahin
main akela magar

kal baDi der tak KHud pe hansta raha
aaine se ye kahta raha

ya to har dard ke koi mani hain
ya phir kisi dard ke koi mani nahin