le chaba ye sar
jo ab jabDon mein hai tere
agar tu waqai mein sher hai to
sher ban kar aaj dikhla de
mujhe joker samajhta tha
are main to faqat is peT ki KHatir
hansane ke liye sab ko
tere jabDon mein sar dene se pahle bhag jata tha
mujhe is khel ki tanKHwah milti thi
yahi kirdar circus mein mere hisse mein aaya tha
magar main aaj tujh ko dekh lunga
dikha dunga zamane ko ki buzdil main nahin buzdil tu hai
le chaba
ab jokaron sa
munh ko phaDe kyun khaDa hai
Nazm
Circus mein naukri ka aaKHiri din
Shariq Kaifi