Chunaw

chaar baras ke
maile kuchle

duble-patle laDke mein thi
ghazab ki phurti

chaurahe par ek taraf ki hari light se
dusri samt ki lal light tak

bijli ki tezi se wo aata jata tha
jo mil jae us ke aage

phailata tha apni hatheli
jis mein

KHush-haali aur lambe jiwan ki
rekhaen thin

chaurahe tak hi mahdud thi us ki duniya
jis ko us ne nahin chuna tha

traffic light ke ird-gard tha us ka jiwan
wo bhi us ne nahin chuna tha

TuTe pul ke niche us ka janam hua tha
wo bhi us ne nahin chuna tha

kal shab
traffic light ko toDne wale Truck se dab kar

maut ho gai us ki
wo bhi us ne nahin chuni thi