ChiDiyan

ye jhuT hai
ki karachi mein

barish ke baad nikalne wali
ghas ki konplen

gahri sabz aur narm nahin hotin
ya ye ki daraKHt

baadalon ki madad ke baghair
saya faraham nahin karte

ye bhi jhuT hai
ki yahan KHargoshon ki aankhen

andhere mein nahin chamaktin
aur gilahriyan

baadam aur aaKHroT ke chhilkon se
nahin khultin

ya ye ki hatheli par rakhne se
bair-bahuTiyan zard paD jati hain

sanp apne hisse ka dudh
kaghzi azdahon ke liye chhoD jate hain

hamare alawa
karachi mein chiDiyan bhi rahti hain

jo goliyon ki aawaz aur dhamakon ke bawajud
daraKHton par se uDti hain diwaron par baiThti hain

kahin na kahin jama ho kar
bila-nagha duaen mangti hain

ya hamari taraf raat bhar
apne apne Thikane mein chhupi rahti hain

aur subh hone tak
bahar nahin nikaltin