ChhuTTi ka din

agar raat aur subh mein farq koi nahin hai
hawa mein parindon ke TuTe hue par

bikharne lage hain
zaminon pe ahkaam ke lambe chabuk se

tariKH-dan apni gardan jhukae hue hain
nasibon ki aawaz mein waqt Dhalne laga hai

to phir!
nazm likhne ki KHwahish

gunahgar insaf ke faislon se zyaada bari to nahin hai
agar mausamon ki ragon mein lahu jam gaya hai

shikari ki aankhon mein barud jalne laga hai
dinon ke tamawwuj mein

suraj ka chehra utarne laga hai
to phir

sans lene ki KHwahish
naqab-zan ki dhamki se zyaada bari to nahin hai

mujhe nazm likhne do
aur sans lene do

kuchh der apni kamanon ko nicha karo
aaj chhuTTi ka din hai