kohna-tar zin badli gai
phir nai na'al-bandi hui
aur faras hinhinaya
sawar ab sawari par majbur tha
main akela aza-dar
kitne yugon se
uThae hue
jism ka taziya
KHud hi apne janam-din pe masrur tha
kapkapati chhuri
cake ko wast tak
chir kar ruk gai
dil larazne laga
zoaf ki mari phunkon ne
ek ek kar ke
bhaDakti lawon ko bujhaya
azizon ne
bachchon ne
tali bajai
mubarak mubarak hui
cake ka ek TukDa
mere munh mein Thunsa gaya
na'al ki shakl ka
Nazm
Cake ka ek TukDa
Rafiq Sandelvi