Be-ghari

KHwab ki saltanat se udhar
ek jahan hai jise aankh aabaad kar le to kar le

wahan sae hi sae hain
aksar o besh-tar dhup mein raqs karte hue

rezgari ki aawaz par dhaDkanen tal deti hain to jhilmilate hain
aankhon mein KHwab

(apna ghar us ke dar-ul-KHilafe mein hai)
subh se sham tak

note ginti hui ungliyan yun thirakti hain
jaise tamannaon ko thapkiyan de shab-e-hijr mein ek birhan ka dil

roz KHwabon ki punji mein sikkon ke girne se ek gunj uThti hai
goya kahin Tin ki chhat pe barish ke qatre paDen

roz ek ghar tamanna ke malbe se aankhon ke patal mein jhankta hai
wahi be-ghari be-zamini ka dukh aaj tak mujh ko ghere hue hai

main chand aur suraj ki surat falak-dar-falak tairta hun
mere KHwab mujh ko uDae liye ja rahe hain

main pamal hoti hui aarzu mein kahan tak jiyunga