Barf-bari mein

jahan lakDi ki mezon aur nangi kursiyon mein
shah-e-baluti gardanon ka KHam nazar aae

wahan jhukna ibaadat hai
main nange panw bahar aa gaya tha barf-bari mein

meri khiDki ke niche chandni se bhi ziyaada chandni thi
jab hawa pagal hui

aur tum ne chehra moD kar sone ki koshish ki
hawa sunti nahin hai

hawa jab bhi chalegi khiDkiyon par zarb aaegi
koi aawaz bhi hogi

chalo aisa karo so lo
tum apni nind do din ke liye mahfuz kar lo

barf-bari mein rifaqat ki har ek surat ibaadat hai