kisi din aa
purani khaion ko par kar ke
daldalon mein panw rakkhen
narsalon ko kaT Dalen
pesh-e-manzar ke liye rasta banaen
aa kisi din
dhund mein jakDi hui
kanTon bhari ye baD
jis mein waqt ki bijli rawan hai
jo zamin o aasman ko
kaTti hai
bich se
us ko haTaen
aa kisi din
jhulte pul se utar kar
naqsha-e-taqwim mein
pur-pech kohsaron ke andar
jhag uDati
shor karti
bal pe bal khati nadi mein
ghota-zan hon
tairte jaen!
kisi din aa
baDa chakkar lagaen!!
Nazm
BaDa chakkar lagaen
Rafiq Sandelvi