Baat phansi ke din ki nahin

oxygen ki tube
aur phansi ke phande mein waise bhi kya farq hai

baat phansi ya phansi ke din ki nahin
maut ki bhi nahin

baat to lash ke mazhaka-KHez lagne ki hai
fikr lashe ki hai

jaane kaisi lage?
ek fuT lambi patli si gardan

mere itne bhaari badan par
aur zaban?

wo jo sunte hain itni nikal aaegi munh ke bahar
kali-mai ki surat

kahin wo Dara to nahin degi bachchon ko mere
aur wo sab nek insan jo ghusl denge mere jism ko

so bhi paenge kya chain se?
ya mera bhut un ko Daraata rahega mahinon talak

main nahin chahta koi mujh se Dare
koi mujh par hanse

zindagi ek latife ki surat kaTi kuchh shikayat nahin
han magar

lash ki shakl mein mazhaka-KHez lagne se Darta hun main
baat itni si hai

baat phansi ya phansi ke din ki nahin