Ayaz chup hai

ayaz chup hai
sada-e-mahmud harb-e-taza ki tez-tar rau mein

bah gai hai
ayaz chup hai

ayaz chup hai ki ab asiran-e-shab bhi
KHwabida aks le kar

thaki thaki KHwahishon ke sinon pe so gae hain
wo din ki jis din

jale hue taqchon pe harfon ki be-kafan lash
dafn hogi

wo din calender ki sabz tah se sarak gaya hai
ayaz chup hai

luTi hui bastiyon mein tariKH ka paDaw
safon mein tartib DhunDhta hai

lahu ki hiddat mein munqasim subh kam-nasiban ka garm suraj
hazar-ha girhen kholta hai

to shahr-e-kohsar ke jilau mein qadim shahrah puchhti hai
ayaz chup hai ki bolta hai

ayaz chup hai
sada-e-mahmud harb-e-taza ki tez-tar rau mein bah gai hai