Arabchi so gaya hai

arabchi so gaya hai
tulani faslon ki

thakan se maghlub ho gaya hai
KHabar nahin hai use kahan hai

bas ek lambe kaTe-phaTe
na-tarash raste pe chobi gaDi

azal se yunhi
abad ki jaanib rawan-dawan hai

zara se jhaTke se
charcharaati hai jab

to bosidgi ki lakhon tahon mein lipTa
har ek zi-ruh chaunkta hai

arabchi KHwab dekhta hai
wo shah-zadi ka hath thame

sunahri rath mein sawar ho kar
ajab jahanon mein shubh zamanon mein

kho gaya hai
arabchi so gaya hai!