Album

hari masjid ki halki dhup mein
taza wazu se gile panw

aur Tapakti aastinon ki chamak mein log the
jo saf-ba-saf

apna janaza paDh rahe the
sadar darwaze se

ek barud mein Duba hua
jannat ka saTTa-baz aur huron ka saudagar

achanak sahw ka sajda ada karne ko aaya
aur hari masjid ne apna rang badla

qurmuzi dahliz par jitne bhi jute the
wo taza KHun par pahle to tere

aur phir
jamte lahu par jam gae

main bachpan mein
kai mulkon ke sikke aur Ticketen jama karta tha

bayaz-e-zehn ke tarik pannon par
main ab jismon ke TukDe jama karta hun

meri album ke safhon ki tahon se KHun nikalta hai
meri aankhon se rista hai