main chahti hun
ki agli rut mein milun jo tum se
janam janam ki thakawaton ke KHutut chehre se miT chuke hon
qadam qadam ek safar ki pichhli alamaten sab guzar chuki hon
malal-e-sahra-nawardi panw ke aablon mein simaT chuka ho
musafirat ki tamam ranjish
mere masamon se dhul chuki ho
kisi bhi patthar ka koi dhabba
kisi bhi chaukhaT ka koi qarza
meri jabin par rahe na larzan
main chahti hun ki agli rut mein milen jo hum tum
damak raha ho yun mera daman
ki tum jo chaho
namaz paDh lo
Nazm
Agli rut ki namaz
Shahnaz Nabi