Agar unhen malum ho jae

wo zindagi ko Daraate hain
maut ko rishwat dete hain

aur us ki aankh par paTTi bandh dete hain
wo hamein tohfe mein KHanjar bhejte hain

aur ummid rakhte hain
hum KHud ko halak kar lenge

wo chiDiya-ghar mein
sher ke pinjre ki jali ko kamzor rakhte hain

aur jab hum wahan sair karne jate hain
us din wo sher ka raatib band kar dete hain

jab chand TuTa phuTa nahin hota
wo hamein ek jazire ki sair ko bulate hain

jahan na mare jaane ki zamanat ka kaghaz
wo kashti mein idhar udhar kar dete hain

agar unhen malum ho jae
wo achchhe qatil nahin

to wo kanpne lagen
aur un ki naukariyan chhin jaen

wo hamare mare jaane ka KHwab dekhte hain
aur tabir ki kitabon ko jala dete hain

wo hamare nam ki qabr khodte hain
aur us mein luT ka mal chhupa dete hain

agar unhen malum bhi ho jae
ki hamein kaise mara ja sakta hai

phir bhi wo hamein nahin mar sakte