Adam KHwab ke KHwab mein

chhan kar dekh li reg-e-dasht-e-ziyan
DhunDh pae na hum dusra aasman

ajnabi mausamon ki uDanon mein TuTe paron ki tarah
hum jiye bhi to kya

kis ne dekha hamein
chashm-e-nam ke kinaron pe Thahre hue manzaron ki tarah

raat ki aankh se bah gae KHwab bhi hum bhi
madum ki an-suli nind mein

yaad ke taq mein ab tamanna ki lo
ka nishan tak nahin

wahima sa hai bas
koi aahaT thi hamrah ya kuchh na tha

KHwab-e-hasti hamein ek aziyyat bhare
dam-e-madumiyat ke siwa kuchh na tha