Aamad

hamari sanson ki jalwa-gah mein
wo sare chehre

yugon ke pahre
jo sat pani ke par ja kar

base hue hain
phir aaj sayyal satah par

jhilmila rahe hain
sarab ke aainon mein

hona na hona apna dikha rahe hain
qarib aa kar hamein bahut dur

KHud se bahar bula rahe hain
aur hum ye chehre

ragon ke sahil pe naqsh jaise saja chuke hain
jahan hamara koi nahin hai

wahin pe pahle se aa chuke hain