AaKHiri lamha

tum meri zindagi mein aai ho
mera ek panw jab rikab mein hai

dil ki dhaDkan hai Dubne ke qarib
sans har lahza pech-o-tab mein hai

TuTte be-KHarosh taron ki
aaKHiri kapkapi raubab mein hai

koi manzil na jada-e-manzil
rasta gum kisi sarab mein hai

tum ko chaha kiya KHayalon mein
tum ko paya bhi jaise KHwab mein hai

tum meri zindagi mein aai ho
mera ek panw jab rikab mein hai

main sochta tha ki tum aaogi tumhein pa kar
main is jahan ke dukh-dard bhul jaunga

gale mein Dal ke banhen jo jhul jaogi
main aasman ke tare bhi toD launga

tum ek bel ki manind baDhti jaogi
na chhu sakengi hawadis ki aandhiyan tum ko

main apni jaan pe sau aafaten uTha lunga
chhupa ke rakkhunga banhon ke darmiyan tum ko

magar main aaj bahut dur jaane wala hun
bas aur chand nafas ko tumhaare pas hun main

tumhein jo pa ke KHushi hai tum us KHushi pe na jao
tumhein ye ilm nahin kis qadar udas hun main

kya tum ko KHabar is duniya ki kya tum ko pata is duniya ka
masum dilon ko dukh dena shewa hai is duniya ka

gham apna nahin gham is ka hai kal jaane tumhaara kya hoga
parwan chaDhogi tum kaise jine ka sahaara kya hoga

aao ki tarasti banhon mein ek bar to tum ko bhar lun main
kal tum jo baDi ho jaogi jab tum ko shuur aa jaega

kitne hi sawalon ka dhaara ehsas se Takra jaega
sochogi ki duniya tabqon mein taqsim hai kyun ye pher hai kya

insan ka insan bairi hai ye zulm hai kya andher hai kya
ye nasl hai kya ye zat hai kya ye nafrat ki talim hai kyun

daulat to bahut hai mulkon mein daulat ki magar taqsim hai kyun
tariKH bataegi tum ko insan se kahan par bhul hui

sarmae ke hathon logon ki kis tarah mohabbat dhul hui
sadiyon se barabar mehnat-kash haalat se laDte aae hain

chhai hai jo ab tak dharti par us raat se laDte aae hain
duniya se abhi tak miT na saka par raj ijara-dari ka

ghurbat hai wahi aflas wahi rona hai wahi bekari ka
mehnat ki abhi tak qadr nahin mehnat ka abhi tak mol nahin

DhunDe nahin miltin wo aankhen jo aankhen ho kashkol nahin
socha tha ki kal is dharti par ek rang naya chha jaega

insan hazar barson ki mehnat ka samar pa jaega
jine ka barabar haq sab ko jab milta wo pal aa na saka

jis kal ki KHatir jite-ji marte rahe wo kal aa na saka
lekin ye laDai KHatm nahin ye jang na hogi band kabhi

sau zaKHm bhi kha kar maidan se haTte nahin jurat-mand kabhi
wo waqt kabhi to aaega jab dil ke chaman lahraenge

mar jaun to kya marne se mere ye KHwab nahin mar jaenge
ye KHwab hi meri daulat hain ye KHwab tumhein de jaunga

is dahr mein jine marne ke aadab tumhein de jaunga
mumkin hai ki ye duniya ki rawish pal bhar ko tumhaara sath na de

kanTon hi ka tohfa nazr kare phulon ki koi saughat na de
mumkin hai tumhaare raste mein har zulm-o-sitam diwar bane

sine mein dahakte shoale hon har sans koi aazar bane
aise mein na khul kar rah jaana ashkon se na aanchal bhar lena

gham aap baDi ek taqat hai ye taqat bas mein kar lena
ho azm to lau de uThta hai har zaKHm sulagte sine ka

jo apna haq KHud chhin sake milta hai use haq jine ka
lekin ye hamesha yaad rahe ek fard ki taqat kuchh bhi nahin

jo bhi ho akele insan se duniya ki baghawat kuchh bhi nahin
tanha jo kisi ko paenge taqat ke shikanje jakDenge

sau hath uThenge jab mil kar duniya ka gareban pakDenge
insan wahi hai tabinda us raaz se jis ka sina hai

auron ke liye to jina hi KHud apne liye bhi jina hai
jine ki har tarah se tamanna hasin hai

har shar ke bawajud ye duniya hasin hai
dariya ki tund baDh bhayanak sahi magar

tufan se khelta hua tinka hasin hai
sahra ka har sukut Daraata rahe to kya

jangal ko kaTta hua rasta hasin hai
dil ko hilae lakh ghaTaon ki ghan-garaj

miTTi pe jo gira hai wo qatra hasin hai
dahshat dila rahi hain chaTanen to kya hua

patthar mein jo sanam hai wo kitna hasin hai
raaton ki tirgi hai jo pur-haul gham nahin

subhon ka jhankta hua chehra hasin hai
hon lakh kohsar bhi hael to kya hua

pal pal chamak raha hai jo tesha hasin hai
lakhon saubaton ka agar samna bhi ho

har johd har amal ka taqaza hasin hai
chaman se chand hi kanTe main chun saka lekin

baDi hai baat jo tum rang-e-gul nikhaar sako
ye dur daur-e-jahan kash tum ko ras aae

tum is zamin ko kuchh aur bhi sanwar sako
amal tumhaara ye taufiq de sake tum ko

ki zindagi ka har ek qarz tum utar sako
safar hayat ka aasan ho hi jata hai

agar ho dil ko sahaara kisi ki chahat ka
wo pyar jis mein na ho aql o dil ki yak-jehti

kisi tariq se jazba nahin mohabbat ka
hazaron sal mein tahzib-e-jism nikhri hai

baja ki jins taqaza hai ek fitrat ka
tumhein kal apne sharik-e-safar ko chunna hai

wo jis se tum ko mohabbat mile rifaqat bhi
hazar ek hon do zehn muKHtalif honge

ye baat talKH hai lekin hai ain-fitrat bhi
bahut hasin hai zehni mufahamat lekin

baDi azim hai aadarsh ki hifazat bhi
kabhi ye gul bhi nazar ko fareb dete hain

har ek phul mein tamiz-e-rang-o-bu rakhna
KHayal jis ka guzar-gah-e-sad-bahaaran hai

har ek qadam usi manzil ki aarzu rakhna
koi bhi farz ho KHwahish se phir bhi bartar hai

tamam umr faraez ki aabru rakhna
tum ek aise gharane ki laj ho jis ne

har ek daur ko tahzib o aagahi di hai
tamam mantiq o hikmat tamam ilm o adab

charagh ban ke zamane ko raushni di hai
jila-watan hue aazadi-e-watan ke liye

mare to aise ki auron ko zindagi di hai
gham-e-hayat se laDte guzar di main ne

magar ye gham hai tumhein kuchh KHushi na de paya
wo pyar jis se laDakpan ke din mahak uTThen

wo pyar bhi main tumhein do ghaDi na de paya
main jaanta hun ki haalat sazgar na the

magar main KHud ko tasalli kabhi na de paya
ye meri nazm mera pyar hai tumhaare liye

ye sher tum ko meri ruh ka pata denge
yahi tumhein mere azm o amal ki denge KHabar

yahi tumhein meri majburiyan bata denge
kabhi jo gham ke andhere mein Dagmagaogi

tumhaari rah mein kitne diye jala denge
ab mere pas aur waqt nahin

sans har lahza iztirab mein hai
larzan larzan koi dhundlaka sa

Dubte zard aaftab mein hai
maut ko kis liye hijab kahen

kis ko malum kya hijab mein hai
jism-o-jaan ka ye aarzi rishta

kitna milta hua hubab mein hai
aaj jo hai wo kal nahin hoga

aadmi kaun se hisab mein hai
KHud zamane badalte rahte hain

zindagi sirf inqalab mein hai
aao aankhon mein Dal do aankhen

ruh ab naza ke azab mein hai
thartharaata hua tumhaara aks

kab se is dida-e-pur-ab mein hai
raushni der se aankhon ki bujhi jati hai

Thik se kuchh bhi dikhai nahin deta mujh ko
ek chehra mere chehre pe jhuka aata hai

kaun hai ye bhi sujhai nahin deta mujh ko
sirf sannaTe ki aawaz chali aati hai

aur to kuchh bhi sunai nahin deta mujh ko
aao us chand se mathe ko zara chum to lun

phir na hoga tumhein ye pyar nasib aa jao
aaKHiri lamha hai sine pe mere sar rakh do

dil ki haalat hui jati hai ajib aa jao
na aizza na ahibba na KHuda hai na rasul

koi is waqt nahin mere qarib aa jao
tum to qarib aa jao!