Aag ki kahaniyan

han ye sach hai
ki tum ne mujhe

aur use
aur phir use

aur aaKHir mein use
bacha liya

main ek aag mein thi
aur mere baad wo bhi

aur phir wo bhi
aur aaKHir mein wo bhi

sirf tum bahar thin
tum ne sab ko dekha

ek ek kar ke
tum ne hamein bacha liya

phir hum ne apni apni aag ki kahaniyan sunain
aur tum ne sunin

hum ne muqabla kiya
apni apni aag ke taqaddus ka

aur shiddat ka
aur tum se chaha

munsifana faisla
tum ne alag alag sab ka KHayal rakha

aur main lauT gai
apne adh-jale bagh ki taraf

aur mere baad wo bhi
aur phir wo bhi

aur aaKHir mein wo bhi
aur koi nahin tha

jab ek aag ne
tumhein jala diya