sham ki sharmili chup ko
ruh mein mahsus karte
kaam mein masruf hain hum dopahar se
dil ki aankhen dekhti hain gahri gahri sabz shaKHon ko
jo baiThi hain KHamoshi se
kiye KHam gardanen apni
kisi dulhan ki surat
sar pe oDhe aasman ki surmai chunari
sitare jis mein Tanke ja rahe hain
hum apne is tasawwur par KHud hi muska rahe hain
Nazm
Sharmili KHamoshi
Tarannum Riyaz