2 qahqaha

ajab raat hai hadd-e-nigah tak har-su
athah zahar bhari chandni ki jhil si hai

wara-e-madd-e-nazar kohar hai taKHayyul ki
wara-e-hadd-e-taKHayyul siyah fasil si hai

saman hai hu ka saDak hai saDak ke dono taraf
qatar ta-ba-ufuq hai ghane daraKHton ki

hawa sanakti hai to chaunk chaunk paDti hain
har ek peD mein ruhen si tira-baKHton ki

kuchh aise ghur ke bas gholte hain sannaTe
hawa ke zor se jab Tahniyan ulajhti hain

dhuen se rengte hain tah-ba-tah KHayalon mein
sukut chiKHta hai siTiyan si bajti hain

nazar uThata hun to zawiye nigahon mein
uTha ke dhul sarabon ki jhonk dete hain

qadam baDhata hun to azhdahe hayulon ke
phanon ke tir kaf-e-pa mein Thonk dete hain

jo sans leta hun to sans sans ki lau par
tafakkuraat ki aandhi si chalne lagti hai

jo sochta hun to ehsas ke mahlakon tak
siyahiyon ki ghalazat uchhalne lagti hai

dil-o-nigah pe kitni muhib tezi se
kuchh uljhanon ke siyah-nag reng aae hain

qadam qadam pe hai kitni amiq-e-fikr ki lau
qadam qadam pe meri rah mein kitne sae hain

mata-e-zist mari lakh hech-maya sahi
magar sitare falak ke na jaane kyun yunhi

udas udas nigahon se mujh ko takte hain
bhala ye sae meri rah rok sakte hain