Shri lal bahadur shastari wazir-e-azam hind

ai bahadur-lal ai bhaarat suput
tu tha amn-o-ashati ka pasdar

amn ki KHatir gaya tha tashqand
tu ne kar di jaan bhi us par nisar

amn-o-sulh-o-jang mein yakta tha tu
bhaarti tahzib ka aaina-dar

paikar-e-ijz-o-KHulus-o-sadagi
tu tha tahzib-o-tamaddun ka nikhaar

tu ne yak-jihati ata ki qaum ko
ekta ka dan bhaarat ko diya

sar hua uncha hamara har jagah
tu ne wo samman bhaarat ko diya

azm tera aahani diwar tha
salamiyat mulk ki thi teri jaan

shan-e-mulk-o-qaum thi pesh-e-nazar
tujh ko apni jaan se baDh kar thi aan

ho gai gul shama de kar raushni
taqaten amn-o-aman ki DaT gain

zindagi ke sath wabasta hai maut
ye haqiqat hai magar kitni ajib

hum ko ye ehsas hota hi nahin
zindagi se maut hai utni qarib

zulmat-e-shab se sahar ki dilkashi
yas se ummid ka raushan hai nam

maut ke roke bhi ruk sakta nahin
zindagi ka karwan tez gam

hind hai is qafile ka rahnuma
karwan-salar mir-e-karwan

amn-e-alam ka alam-bardar hai
amn-parwar sulh-ju hindostan