Wapsi

KHizan ke jate hi rut ka pansa palaT gaya hai
bahaar ki KHushbuon se gulshan ka zarra zarra mahak raha hai

zamin ki rangat badal gai hai
kabhi taghayyur jo mausamon ka

nirale giton ke sath aaya
to zindagi ki aziz-tar saaton ke malik

bhaDak uThe the
palak palak par kai kahe an-kahe fasane

machal gae the
to qand-e-guftar mein bhi talKHi rachi hui thi

faza ki aaludgi ka shikwa tha un ke lab par
shunida baaton ka KHauf un ke dilon mein aisa basa hua tha

ki wo kisi baat par yaqin bhi na karne pate
gire the un ki samaaton aur basaraton par dabiz parde

kabhi jo mausam ne ruKH jo badla
to un ke hosh-o-hawas jage

unhon ne qudrat ke rang dekhe
to zindagi ka yaqin aaya

bahaar ki samt lauT aae