Zulmat hai to phir shoala-e-shab-gir nikalo

zulmat hai to phir shoala-e-shab-gir nikalo
KHurshid koi shab ka jigar chir nikalo

kaTta hai kabhi naKHun-e-angusht se kohsar
patthar na kuredo koi tadbir nikalo

main gul hun mujhe shaKH pe khilna hai ba-har-taur
tum KHak se gul-KHezi ki tasir nikalo

tum roghan-e-KHun burrish-e-shamshir se bhar kar
jo chaho mere jism se taswir nikalo

jo zehn mein tha KHwab mein dekha hai wahi kuchh
jo chaho ab is KHwab ki tabir nikalo

ye shahr-e-shikasta hai nae shahr ki buniyaad
ek taza dar-o-baam ki tamir nikalo

auraq-e-shab-e-rafta siyah honge magar tum
is bab se ye surKHi-e-tahrir nikalo