Zindagi se meri is tarah mulaqat hui

zindagi se meri is tarah mulaqat hui
lab hile aankh mili aur na koi baat hui

dard ki dhup nahin yaad ka saya bhi nahin
ab to qismat meri be-rangi-e-haalat hui

sirf kal hi nahin is daur mein bhi dida-wari
nazr-e-auham hui said-e-riwayat hui

kal to mehwar the meri zat ke ye kaun-o-makan
kaenat aaj jo simTi to meri zat hui

sar ko phoDa kiye patthar se samundar se laDe
subh yun sham hui sham se yun raat hui

ghar mera dekh liya sail-e-bala ne 'shibli'
aagahi kya hui ek dard ki saughat hui