zindagi kitna aazmaegi
aaKHirash wo bhi haar jaegi
kis qadar pyas hai samundar ko
meri tishna-labi bataegi
kya KHabar thi shab-e-firaq ke baad
zindagi KHud bhi ruTh jaegi
kya hua lab ko si diya bhi agar
KHamushi dastan sunaegi
main use kaise bhul paunga
wo mujhe kaise bhul paegi
baad tark-e-talluqat 'saba'
aur bhi us ki yaad aaegi
Ghazal
Zindagi kitna aazmaegi
Kamran Ghani Saba