zindagi ke sarab bhi dekhun
nind aae to KHwab bhi dekhun
raat kaTun kisi KHarabe mein
munh andhere gulab bhi dekhun
harf-e-taza waraq waraq likkhun
sada dil ki kitab bhi dekhun
Dub jaun kisi samundar mein
phir jaziron ke KHwab bhi dekhun
zindagi mein himaqaten bhi karun
us ka phir sadd-e-bab bhi dekhun
aaj dil ki bayaz mein likh kar
lafz KHana-KHarab bhi dekhun
pyas dil ki bujhaun aankhon se
raqs karte habab bhi dekhun
Ghazal
Zindagi ke sarab bhi dekhun
Rasa Chughtai