zindagi ke hasin bahane se
maut milti rahi zamane se
mausam-e-gul KHizan-mizaj sahi
mar ke niklenge aashiyane se
ishq ki aag ai maaz-allah
na kabhi dab saki dabane se
razm-e-dair-o-haram se tang aa kar
dil lagaya sharab-KHane se
faeda kya hai be-shuuron ko
naghma-e-arzu sunane se
jab zamane ka gham uTha na sake
hum hi KHud uTh gae zamane se
Ghazal
Zindagi ke hasin bahane se
Anwar Sabri