zindan mein bhi wahi lab-o-ruKHsar dekhte
darwaza dekhte kabhi diwar dekhte
pasti-nashin ho ke main kitna buland tha
gardan jhuka ke tum mera mear dekhte
sab dauDte the us ki ayaadat ke waste
jis ko zara sa nind se bedar dekhte
dil baiThne lage to nigahen bhi thak gain
kab tak teri taraf tere bimar dekhte
kis darja aane wale zamane ka KHauf tha
bajta gajar to sham ke aasar dekhte
ab kya kahen wo ajnabi kaisa tha hum jise
aankhon pe hath rakh ke bhi lachaar dekhte
tere siwa bhi kuchh nazar aana muhaal tha
duniya ko dekhte ki tera pyar dekhte
na-ashna hain 'ram' jo ghurbat ke nam se
wo kash mere daur ke fankar dekhte
Ghazal
Zindan mein bhi wahi lab-o-ruKHsar dekhte
Ram Riyaz