zinda rahen to kya hai jo mar jaen hum to kya
duniya se KHamushi se guzar jaen hum to kya
hasti hi apni kya hai zamane ke samne
ek KHwab hain jahan mein bikhar jaen hum to kya
ab kaun muntazir hai hamare liye wahan
sham aa gai hai lauT ke ghar jaen hum to kya
dil ki KHalish to sath rahegi tamam umr
dariya-e-gham ke par utar jaen hum to kya
Ghazal
Zinda rahen to kya hai jo mar jaen hum to kya
Muneer Niyazi