Zauq-e-didar-e-tamasha-bar ruswai hua

zauq-e-didar-e-tamasha-bar ruswai hua
KHud tamasha ban gaya jo bhi tamashai hua

qarya qarya DhunDhti hai ruh-e-laila qais ko
najd ke sahra mein phir aisa na saudai hua

jis lahu se dil mein raushan dard ki mashal rahi
wo lahu ek bewafa ke ruKH ki zebai hua

jaan kar hum kya karenge chhoD is qisse ko ab
kaun sachcha ishq mein tha kaun harjai hua

KHud-sari mein apne sae se jo lipTe rah gae
un ghazalon ka muqaddar dasht-e-tanhai hua

raushni ki ek kiran bhi ab to qismat mein nahin
chhin gain aankhen to phir ehsas-e-binai hua

jo zaban par la na sakte the ayan sab par hua
fan hamara bais-e-tazhik-o-ruswai hua

hai junun ke faiz se ye jumbish-e-pa warna kab
KHar-zaron se ilaj-e-abla-pai hua

kya tawaqqoa ab rakhen 'iqbaal' is duniya se hum
har qadam par bhai ka dushman jahan bhai hua