zamzama iztirab kuchh bhi na tha
ishq-e-KHana-KHarab kuchh bhi na tha
mera sab kuchh tha sirf ek sawal
aur is ka jawab kuchh bhi na tha
sans tak to gine-chune hue the
kuchh na tha be-hisab kuchh bhi na tha
sajda-e-shukr ne bachaya hai
warna mera sawab kuchh bhi na tha
ab tujhe dekh kar ye jaana hai
wo jo dekha tha KHwab kuchh bhi na tha
Ghazal
Zamzama iztirab kuchh bhi na tha
Sajjad Baluch